ACHEGAMENTO Á ESCRITA DRAMÁTICA
A dramaturxia é a arte da reprodución e representación da acción en escena. A través do texto (palabras e movementos) deseñamos mundos e xeramos situacións coas diversas ferramentas da escrita dramática: personaxes, tempos e espazos, conflitos, estruturas, temáticas e obxectivos.
Este obradoiro ofértase a todas aquelas persoas interesadas no teatro –profesionais ou non– e, máis concretamente, na escrita dramática. Desde un plantexamento eminentemente práctico, coñeceremos e traballaremos na aula con todos os elementos necesarios para a elaboración dunha composición dramática.
O obxectivo principal deste curso é desenvolver e potenciar as habilidades creativas das participantes, dotándolles de todas as ferramentas necesarias para o entendemento e comprensión da dramaturxia e orientándolles na creación das súas propias escenas.
CONTIDOS
A metodoloxía das aulas combinará breves explicacións teóricas coa lectura e análise de textos dramáticos, así como exercicios prácticos de escrita e composición que permitan afianzar os contidos e desenvolver o estilo das participantes.
CONTIDO DO CURSO
A DRAMATURXIA: ARTE E OFICIO
- Definición do termo.
- A escrita dramática fronte á épica e á lírica.
- Funcións na dramaturxia: dramaturga/o e dramaturxista.
- Mímese / Diéxese.
ESCRIBIR TEATRO: AS FERRAMENTAS DO DRAMA
- Trama de accións.
- O personaxe dramático.
- Tempo e espazo.
- Estrutura (interna e externa).
- Oralidade escénica: monólogo, soliloquio, diálogo.
- Didascalias e acotacións.
- Xéneros dramáticos
DESEÑAR HISTORIAS
- O que e o como: punctum.
- Escrita e presentación de escenas.
- Análise e comentarios.
OBXECTIVOS
- DEFINIR e TRABALLAR o concepto dramaturxia.
- COÑECER as ferramentas do drama.
- EXPERIMENTAR coa escrita.
- ATOPAR e DEFINIR o que e o como das historias.
- CREAR mundos de ficción.
- ESCRIBIR escenas breves.
TEXTOS QUE SE TRABALLARÁN NA AULA (fragmentos aportados polo docente)
- Memoria do incendio, Vanesa Sotelo. DIFUSORA, 2012.
- Despois das ondas, Ernesto Is. DEPUTACIÓN DA CORUÑA, 2018.
- Lonxe (Far Away), Caryl Churchill. GALAXIA, 2010.
- El jardín quemado, Juan Mayorga. LA UÑA ROTA, 2014.
[ Antes do inicio do curso é recomendable, mais non obrigatorio, ler a peza Litoral, de Wajdi Mouawad (KRK Ediciones, 2010) ]
PARTICIPANTES
- Persoas vencelladas ás artes escénicas –con e sen experiencia– ou apaixonadas da escrita e da creación de historias.
- Mínimo 6 e máximo 12 alumnas/os. Posibilidade de facelo online.
- As alumnas/os traerán material para a escrita (caderno, follas ou ordenador portátil) ao curso.
DURACIÓN
Intensivo de 2 días:
- Sábado 23 de abril de 2022 de 10:00-14:30h e de 16:30h-19:30H
- Domingo 24 de abril de 2022 de 10:00-14:30h
BIO
Titulado superior en dramaturxia pola ESAD de Galicia, anteriormente fórmase no eido da realización e da produción audiovisual. Completa a súa formación con diversos obradoiros impartidos por Alfredo Sanzol, Paula Carballeira, Antonio Rojano, Sergio Blanco ou Bárbara Colio, entre outros profesionais da escena e da escrita dramática.
Ademais da súa faceta de dramaturgo, traballa como narrador oral e profesor de teatro e escrita. É membro do consello de redacción da erregueté | Revista Galega de Teatro e un dos coordinadores do sitio web www.erreguete.gal. Colabora habitualmente coa Revista Grial (Editorial Galaxia) e con A Movida de Vigo.
No ano 2016 gaña (ex aequo) o Premio Abrente da MIT de Ribadavia coa obra Fendas. En 2017 obtén o Premio Rafael Dieste de Textos Teatrais da Deputación da Coruña con Despois das ondas, monólogo dramático sobre a vida da actriz franco-galega María Casares que foi levado á escena pola compañía ButacaZero o pasado 2019; montaxe pola que foi candidato a mellor texto orixinal nos XXIV Premios María Casares. Volve gañar o Premio Abrente, na edición do ano 2021, coa peza Profetas.
Participou no VI Programa de ‘Dramaturgias Actuales’ do INAEM (2017), dando como resultado o texto El hombre que soñaba con elefantes en las estrellas. No 2018, forma parte do grupo de traballo para a escrita teatral ‘DramaturXa’ do Centro Dramático Galego, no que desenvolve a peza Onde veñen morrer as baleas baixo a coordinación de Manuel Lourenzo. En 2020, os teatros Arriaga (Bilbao), Victoria Eugenia (Donostia) e Principal (Vitoria) seleccionaron o seu proxecto Canciones amarillas para flores tristes no programa Antzerkigintza Berriak de novas dramaturxias. En 2021, escribe a peza de teatro documental Relato para un incendio ao abeiro da primeira bolsa de dramaturxia e creación do sector teatral, impulsada pola Agadic a través do Centro Dramático Galego.
Membro e fundador de Feira do Leste (Exilio das Moscas e Tras Tannhäuser —axudas á Creación Joven do INJUVE—), ten escrito textos tamén para as compañías Señora Supina (Hotel Europa) e Inversa Teatro (O Péndulo).
BIBLIOGRAFÍA ESCOLLIDA
2022 O Péndulo (coescrito xunto a Marta Pérez) Edicións Positivas, Compostela – ISBN 978-84-124258-3-3
2022 Hotel Europa Edicións Positivas, Compostela – ISBN 978-84-124258-5-7
2019 Onde veñen morrer as baleas (no libro DramaturXA) Edicións Positivas e AGADIC, Compostela – ISBN 13-978-84-453-5328-8
2018 Despois das Ondas Deputación Provincial da Coruña, A Coruña – ISBN 978-84-9812-326-5
2018 Tras Tannhäuser (na colección Dramaturxia Galega Actual Vol. 1) Edicións Á Feira, Vigo – ISBN 978-84-09-00858-2
2018 Fendas Difusora de Letras Artes e Ideas, Ourense – ISBN 978-84-92958-45-0
2017 El hombre que soñaba con elefantes en las estrellas Edición online en Muestra de Teatro Español de Autores Contemporáneos